Ciüicinada

S’ère piö ü sognadür che ü casadür
con tate bale e pöche pole…
e longhe caminade sòta ol pis di fraschère
per indà e tacà fò i me primaére…
‘ndormet drè a öna büsarola spalancàda
per vèt i culur del sul a la sò leada…
col durt söl brucù e ol sciòp scargàt
e l’osèl che al vaa cià ‘mboletat…
Quate fadighe deè a ü tabiòt, quante emusiù
picole storie per öna pasiù….
Ma col tep al sè cambiat la moral
e ‘l casadür l’è dientat ü criminal…
anche ol me chòcher cüar da la moér
al ma tradit e l’à cambiat mester…
e a quac manere rüspae sà un po’ de òsei
ma me tocàa fa sito e mangià i casunsèi.
Stöf de es ol zimbel de la piasa
ö rinunciat per semper a andà a càsa.
Ö tentat de fam ün otra cultüra
ma la televisiù per mè l’è ‘na tortura
e olm giornal del mè pais
l’è bèl, l’è sciòr ma l’è ü pastìs…
la politica l’è semper piö sporca
e coi tàse e te mèt sö la förca…
e i violense di porsei söi scetì?…
oter che i casadür coi oselì…
e guere, e bombe e distrusiù…
e mafia e corrusiù e prostitusiù
e i röba e i cöpa e as crèpa de aidiesse
e i dutur i campa bè coi sò copresse!
me ö perdit anche ol post de operare
per beneficià ol me padrù miliardare.
Per soleam ‘n po’ de chesta éta
a me sconde despes in sofeta
e an dò a truà ol me oselì
chel me specia col pignulì
e quando a ghe dèrve ol sportiöl
lü al gira e al fà chèl chel völ
al vula contèt sö la me pelada
al pestìna e al me dà öna bechinada
e po’ ‘nsema coi noste cipinade
an fa sö i noste serenade
sarò dientat ü pöer casaur rembambit
ma me sto bè col me oselì proibit…
E o scundit ol me ciüicì… per trüal mia..
in dü armare ‘ncarolet. ma piè de poesia…

Pietro Tòcio Pesenti